geschichte
- Erinnerungen -

De Prinzessinweg


Jan Eilers

De Prinzessinweg
In de fofftiger Jahrn kunn man seggen: Und wenn es rumst und kracht, dann wissens wir genau, der Prinzessinweg macht die Autos zur wilden Sau! Alle Ogenblicke knallte dat dor, man keek all gornich mehr hen. Dat Blaubasaltplaa-ster weer bi Feuchtigkeit gefährlich, bi Sprührägen weert jüß so äs Smäärseep. De Ollnborger Umgehungsstraat twüschen Hauptstraat un Ofener Straat weer dör den Krieg nich fertig woorn. Een grooden Deel van den Noord-Sööd-Autoverkehr moß sick dör den engen Prinzessinweg quälen, van Flensburg na München, van Skandinavien na Italien. Nümms har mit disse Auto-Lawine rääkt, un Hitler wull ja de Umgehungsstraat ut rein militärische Gründe boon. De Kriegshafen Wilhelmshaven schull direkt an't Binnenland anbunden weern. Wo de Grenze twüschen Eversten un Dobbenviertel is, kann nümms genau seggen. Wenn man avers den Prinzessinweg äs disse Grenze ankieken deiht, ligg man woll tämlich genau richtig. Froher weer dat'n Sandpadd, also good för Paar. De Ollnborger Prinzessinnen kunn hier dat Rieden lehrn, later woor de Weg mit Koppsteeen plastert. An Enn van de twintiger un Anfang van de darti-ger Jahrn woor de Straat uprääten, Kanalisation keem un nee-et Plaaster, dat Blaubasalt. Later versuchte man, mit'n Teer-Överguß de Gefährlichkeit to minnern, avers de Teer woor gau afradeert.

De mehrsten Hüüser weern lüttjet un unschienbar, un doch geevt ne ganze Reehe van Geschäfte. Dat weern an de Westsiet (Everstensiet) Gärtneree Theodor Kistner, Colonialwaren Karl Bei der Kellen, Wirtschaft Posner, Köhlenge-schäft August Lader, Fahrradladen Janßen, Schlachteree Wiefei, Fahrschool Granz un Boostoffgeschäft Griepenkerl. An de Ostsiet (Dobbensiet): Melk-Laden Friedritz, Malergeschäft August Schnittker, Boogeschäft Rosenbrock, Bäckeree August Schröder, Strickeree Herz, Getreide- un Düngergeschäft Henjes un de Wirtschaft Feddern.

Dat Malergeschäft August Schnittker woor van sein Söhn Heinz övernah-men. Vääle Lüe kennt Heinz Schnittker van de Bühne oder van't Fernsehen äs plattdüütschen Schauspääler. Toletzt weer he Leiter van de Ollnborger August-Hinrichs-Bühne. Wenn man wat van de Landhandel Henjes brüüken dee, sä man: Wi mööt na'n Ammerlänner. Bi'n Ammerlänner stünn uck de amtliche Wagd. Dor gung man mit weeke Knee hen, wenn man för't Ernährungsamt dat Huus-Schwien weegen laaten moß. Een reinet Gewääten har man ja nie. Ganz ut'n Rahmen van all de eenfachen Hüüs füll de Bäckeree August Schröder. Hüüt noch'n imposant Gebööde, weer dat dormals'n „Palast". De unvörstellbare Summe van achtunveertigdusend Mark har he kost. De Söhn Hans Schröder hett dat Geschäft utboot to de „Stadtbäckerei" mit säven Filialen in de Stadt. Dat Dree-Eck Hauptstraat-Bernhardstraat-Prinzessinweg weer verpacht an Kleingarten, man har dor'n „Fand Acker". Later woor dorvan'n Sportplatz maakt, de Jahnwiese. Ganz in de Nähgde, in de Gärtnerstraat, wähnte een ganz bekannte Ollnborger, de Luftfahrtpionier un „Alte Adler", de Gewerbeoberlehrer un Flieger-Oberstabsingenieur Friedrich Jahn. In'n April eenunnängzig is he in'n Oller van hunnerteen Jahrn van us gahn.

De Umgehungsstraat to ebener Eer, so äs plant, is nie boot woorn, se woor foors up Stellten un Dämme sett. Doch äs se to ne rejelle Stadt-Au tobahn utboot woor (Westkreuz), dor weern de Stellten un Bärge nich hoch nooch. De Bröögen an de Gneisenaustraat un an de Bloherfelder Straat bi de Molkeree moßen afbraaken un högersett weern.

Dör'n Prinzessinweg is immer noch schlecht dörtokaamen, wegen de Autos. Blot de föhrt nich mehr, de staht dor jetzt. Bit dat so wiet weer, wo manche Schuppen Sand moßen bewegt, wo manche Mark utgääven, wo manche Teeknung maakt, wo välle Prozesse föhrt weern, dat kann hüüt nümms mehr naföhlen!

Quelle:

Hans-Günther Zemke (Hg), "Eversten an der Schwelle zum Jahr 2000", Verlag Ernst Knoth, Melle 1999, ISBN 3-88368-310-8.
Jan Eilers, Oldenburg